༄༅།། རྩོམ་རིག་གི་བླ་སྲོག

 འོན་ཀྱང་ངས་བལྟས་ན་སོ་སོས་རང་ཉིད་ལ་བདེན་ཁ་སྟེར་རྒྱུ་མང་དྲགས་པས།ལམ་བརྩད་ནས་ཕན་ཚུན་ལ་ཕོག་ཐུགས་བཏང་བ་དང་ཁ་ཁར་གྱེས་པ་མང་།ལམ་ནི་མི་ཀུན་ལ་དགོས་པ་གཅིག་མཚུངས་ཡིན་ཡང་། ལམ་དབང་ཤེད་ཀྱིས་འཛིན་མི་ཉན།
ད་ལྟ་ལམ་ལབ་དུས་བོད་མི་མང་བོ་ཞིག་གིས་ལམ་སེང་དབུ་མའི་ལམ་ལ་གོ་བ་ལེན་མཁན་ཡོད་ལ། དེ་ནི་ལམ་ངོས་ཟིན་མེད་པའི་དན་རྟགས་ཤིག་ལས་མ་འདས་སོ།།  སྤྱིར་བཏང་ལམ་ལ་རིགས་མི་འདྲ་བ་མང་། དཔེར་ན། གཞུང་ནས་བཤད་པའི་ལམ་ལྔ་གསུམ་བཅོ་ལྔ། དེ་ཡང་ཐེག་ཆེན་གྱི་ལམ། ཐེག་དམན་གྱི་ལམ་ཞེས་གཞུང་ཆེན་མོ་དག་ན་གསལ། འོན་ཀྱང་༧གོང་ས་མཆོག་གིས་འདི་ལ་ཉན་རང་དང་བྱང་སེམས་ཀྱི་ལམ་ཞེས་བཏགས་ན་བཟང་བར་གསུངས། ད་དུང་འཇིག་རྟེན་པའི་ལམ། འཇིག་རྟེན་ལས་འདས་པའི་ལམ་ཞེས་མདོ་དང་རྒྱ་གཞུང་གང་མང་ན་གསལ་བོར་འཁོད་ཡོད། སྐུ་ཞབས་ཞོགས་དུང་གིས་ཀྱང་དེའི་གོ་དོན་རྙེད་ཡོད་མེད་དོགས་གནས་ཡིན་ཀྱང་། དེ་འདྲའི་ཐ་སྙད་ཁོང་གི་དེབ་ནང་དུ་ཡང་དང་བསྐྱར་དུ་བཀོད་འདུག མདོར་ན་རྒྱལ་ཁབ་རེ་ལ་ལམ་དང་ལམ་ལུགས་རེ་ཡོད། བོད་ལ་མཚོན་ན་ལམ་དངོས་གནས་དང་བཏགས་པ་གཉིས་ནོར་མཁན་ཤིན་ཏུ་མང་། དེའི་རྒྱུ་མཚན་གྱིས་ཆོལ་ཁ་དང་ཆོས་ལུགས་ཀྱི་རྩོད་ཉོག་བྱུང་དང་འབྱུང་ངེས་པ་རེད། ཕྱོགས་གཞན་ཞིག་ནས་གླེང་ན། གཞུང་ལམ། སྒེར་ལམ། ལྕགས་ལམ། མེ་འཁོར་ལམ། རྐང་འཁོར་ལམ། སྤྱི་སྤྱོད་རླངས་འཁོར་གྱི་ལམ། མདུན་ལམ། རྐང་ལམ་སོགས་མང་།
ལམ་ཡོད་ཚད་མཉམ་དུ་བསྲེས་ཏེ་ནོར་ཡོད་མེད་བཤད་མཁན་མང་ལ། དེའི་ཐད་ཀྱི་ཕན་ཚུན་ལ་ཟུར་ཟ་དང་སྐྱོན་བརྗོད་བྱས་པ་གྲངས་མ་མཆིས། མདོར་ན་ལམ་ནོར་ཡོད་མེད་འདི་སུ་ཞིག་གིས་ཐག་གཅོད་མི་ཐུབ། མདུན་ལམ་དང་རྐང་ལམ་གཉིས་ཀྱི་དབང་ཚད་སྒེར་སོ་སོ་ལ་ཡོད་མོད། མང་བོ་ཞིག་གིས་གནད་འགག་འདི་མ་རྟོགས་ནས་ཁྱེད་ཀྱི་མདུན་ལམ་ནོར་ཚུལ་སོགས་ལག་པས་བྲིས། ཁ་ནས་བཤད། གཞན་ལ་བསྒྲགས། ངོ་ལྐོག་གཉིས་ནས་དགག་རྒྱག་བྱས། རྩ་བའི་རང་ཉིད་ཀྱིས་ལམ་ངོས་མ་ཟིན་པའི་གནད་འགག་ལ་བསམ་བློ་བཏང་མྱོང་མེད། ད་ནས་བཟུང་ལམ་མང་བོ་ཡོད་པ་ཡིད་ལ་བཟུང་སྟེ། གཞན་གྱི་མདུན་ལམ་དང་རྐང་ལམ། ལངས་ཕྱོགས་ཀྱི་ལམ་སོགས་ལ་མཐའ་གཅིག་ཏུ་དགག་རྒྱག་མ་བྱེད། ཁྱོས་ལམ་ད་དུང་ངོས་ཟིན་མི་འདུག ལམ་ཡོད་ཚད་ལ་གུས་བཀུར་དང་བརྩི་འཇོག་བྱེད་རྒྱུ་གལ་ཆེ་ཡང་། ལམ་ཡོད་ཚད་ལ་ཞུགས་མི་ཉན། ལམ་ཡོད་ཚད་ཤེས་དགོས་མོད། ལམ་ཡོད་ཚད་ལ་ཁ་ལམ་སེང་ཁ་གཏོང་རྐྱང་མིན། མདོར་ན་ཤཱཀྱ་ཐུབ་པའི་ལམ་རྒྱ་ཆེན་ཚུལ་དང་རང་ཉིད་ཀྱི་རྐང་ལམ་དོག་དྲགས་འདུག་སྙམ་པའི་ལྟ་ཚུལ་འཛིན་མི་ཉན། ཤཱཀྱ་ཐུབ་པའི་ལམ་དེ་ཁྱེད་ལ་གནང་ཡོད་ལ་ཁྱེད་ཀྱིས་བེད་སྤྱོད་གཏོང་ཤེས་ན་ཁྱེད་ཀྱི་ལག་ཏུ་ཡོད། རྒྱལ་ཁབ་ཀྱི་ལམ་དང་སྒེར་གྱི་ལམ། མིའི་མདུན་ལམ་དང་རྐང་ལམ་སོགས་ལ་བཟང་ངན་གཏན་ནས་འབྱེད་མི་ཆོག འདི་ནི་དཀོན་མཆོག་ཁས་མི་ལེན་གྱི་གནད་འགག་མིན། འདི་ནི་དྲང་བདེན་དང་བརྩི་འཇོག གུས་བཀུར་སོགས་མི་ཡུལ་ན་ཡོད་མེད་ཀྱི་གནད་དོན་དུ་སེམས་སོ།།
གྲོགས་པོ་ཚོ། སོ་སོའི་ལམ་ལས་གཞན་གྱི་ལམ་ལ་བལྟ་བྱེད་ཀྱི་མིག་ཅིག་བཙལ་རོགས་ཞེས་འབོད་སྐུལ་ཞུས་པ་ཡིན། འདི་ནི་ལམ་གྱི་ལམ་གནད་དོན་ལ་བསམ་བློ་བཏང་ནས་ཞིབ་འཇུག་གི་ཚུལ་དུ་བྲིས་པ་ཡིན། འོན་ཀྱང་རང་ཉིད་ཀྱི་ལམ་ཟེར་ནས་ཡོད་མདོག་བྱས་པ་མ་གཏོགས་ངས་རང་ཉིད་ཀྱི་ལམ་རྙེད་མེད། གལ་སྲིད་ངས་རང་ཉིད་ཀྱི་ལམ་རྙེད་ཡོད་ཚེ་འདི་ལྟར་འདུག་མི་སྲིད།